Cada módulo metálico contará con aseo individual e aire climatizado polos que a Xunta está disposta a pagar ata 608.000 euros durante un máximo de dous anos
O Sergas vén de sacar a concurso a instalación e mantemento de 50 módulos prefabricados para substituír as habitacións do persoal médico que fai gardas no Complexo Hospitalario Universitario da Coruña (CHUAC) mentres as súas obras de ampliación non habiliten novos espazos. Ata agora ese persoal empregaba o Hotel de Pacientes, pero a súa demolición para construír novos edificios do complexo hospitalario coruñés xa está adxudicada e iso "provoca a necesidade urxente, inaprazable e imprescindible de proporcionar un novo espazo para a ubicación das habitacións dos facultativos que realizan gardas". Os módulos instalaranse no que hoxe é un aparcamento de persoal do complexo, ao oeste do mesmo.
Segundo os pregos de condicións do concurso agora convocado, Sanidade está disposta a pagar pola instalación e mantemento dos 50 módulos ata 608.000 euros durante un máximo de dous anos (un ano prorrogable por outro), aínda que a documentación tamén sinala que o prazo de execución da nova torre polivalente que ocupará o espazo do Hotel de Pacientes e que substituirá parte das súas funcións é de 18 meses.
Cada módulo terá 6,21 metros de longo, 2,44 de ancho e unha altura libre interior mínima de 2,5 metros
Para cada módulo establécense unhas dimensións de 6,21 metros de longo, 2,44 de ancho e 3 de alto, cunha altura libre interior mínima de 2,5 metros. Serán metálicos e deberán contar con climatización e calefacción de xeito que garantan unha temperatura interior en inverno de entre 21 e 23 graos e en verán de entre 23 e 25. Tamén deberán contar con cando menos unha fiestra dun mínimo de 1,5 por 1,2 metros.
O interior de cada módulo deberá contar cun aseo equipado con lavabo, ducha con mampara e inodoro. No exterior o Sergas proporá as cores e motivos dos vinilos adhesivos que os recubrirán.
Os módulos instalaranse no que hoxe é un aparcamento de persoal do complexo
A empresa que resulte adxudicataria do contrato deberá realizar as instalacións, acometidas de servizos e o mantemento durante todo o tempo que os módulos estean en servizo. Os pregos tamén recollen diversas condicións das acometidas eléctricas, instalacións contra incendios ou iluminación.